اسلام آباد:پاک فوج نے سابق ڈی جی آئی ایس آئی جنرل ریٹائرڈ فیض حمیدکے خلاف ہاؤسنگ سوسائٹی پر دباؤ ڈالنے کے الزامات کی تحقیقات کیلئے کمیٹی تشکیل دے دی ہے۔
ذرائع کے مطابق پاک فوج نے سپریم کورٹ اور وزارت دفاع کی ہدایت پر ادارے کے اندر خوداحتسابی کا سلسلہ شروع کردیاہے اورسابق ڈی جی آئی ایس آئی لیفٹیننٹ جنرل ریٹائرڈفیض حمید کے خلاف ٹاپ سٹی اسکینڈل کی تحقیقات کے لئے اعلیٰ سطح کی کمیٹی تشکیل دیدی ہے۔
ذرائع کا کہنا ہے میجر جنرل کی سربراہی میں تشکیل دی گئی کمیٹی سابق ڈی جی آئی ایس آئی کی جانب سے اپنا اثر رسوخ استعمال کرتے ہوئے ٹاپ سٹی انتظامیہ پر دباؤ ڈال کر ناجائز مفادات حاصل کرنے کے الزامات کا جائزہ لے گی اور الزامات ثابت ہونے پر کارروائی کے لئے سفارشات بھی پیش کرے گی۔
ذرائع کے مطابق چیف جسٹس قاضی فائز عیسی کی سربراہی میں سپریم کورٹ کے تین رکنی بینچ نے اس کیس میں آ رٹیکل ایک سو چوراسی تین کے تحت کارروائی سے انکار کرتے ہوئے درخواست گذارکووزارت دفاع سے رجوع کرنے کا حکم دیا تھا اور کہا تھا کہ ادارے کی عزت کا معاملہ ہے اس لئے ادارے کو خود کارروائی کرنا چاہیے۔
جس پر وزارت دفاع کے احکامات پرپاک فوج کی قیادت نے ادارے کے اندرونی نگرانی و خود احتسابی کے نظام کے تحت اپنے سابق افسر پر لگنے والے الزامات کی خود تحقیقات کا فیصلہ کیا۔
