ایلون مسک کے نجی طیارے کو ٹریک کرنے والے جیک سوینی نے مارک زکربرگ کی نئی ایپلیکیشن ’تھریڈز‘ پر اکاؤنٹ بنا لیا ہے۔
سوینی نے تھریڈز پر پہلی پوسٹ کرتے ہوئے کہا کہ ’ایلون جیٹ تھریڈز پر آگیا ہے‘۔تین دن قبل بنائے گئے اس اکاؤنٹ کے ہفتے کے روز تک 21 ہزار فالوورز ہوچکے ہیں۔
یاد رہے کہ ’ایلون جیٹ‘ نامی ٹوئٹر اکاؤنٹ عوامی سطح پر دستیاب معلومات استعمال کرتے ہوئے ایلون مسک کے نجی طیارے کی لوکیشن ٹریک کرتا تھا۔
دسمبر میں ٹوئٹر نے ’ایلون جیٹ‘ کو معطل کر دیا تھا، ایلون مسک نے بیان دیا تھا کہ اس اکاؤنٹ کو بنانے والے شخص کے خلاف قانونی کارروائی کریں گے کیونکہ کوئی ان کے بیٹے کا پیچھا کر رہا ہے۔
خیال رہے کہ میٹا کی طرف سے بنائی گئی ایپ تھریڈز، ٹوئٹر کیلئے براہ راست خطرہ ہے۔
تھریڈز پر کم کارڈیشن، جینیفر لوپیز، امریکی ڈیموکریٹ رہنما الیگزینڈریا اوکاسیو اور کئی اہم شخصیات نے یہاں اپنے اکاؤنٹس کھول لیے ہیں۔
