لاہور: انسداد دہشت گردی کی عدالت نے تحریک انصاف کے صدر چوہدری پرویز الٰہی کی عبوری ضمانت خارج کردی۔
سابق وزیراعلیٰ پنجاب پرویز الٰہی نے گھر پر پولیس آپریشن کے دوران درج مقدمے میں ضمانت حاصل کر رکھی تھی، آج پیشی کے موقع پر ان کی جانب سے حاضری معافی کی درخواست جمع کروائی گئی۔
وکیل نے عدالت میں موٴقف اختیار کیا کہ چوہدری پرویز الٰہی میڈیکل بنیاد پر عدالت میں پیش نہیں ہو سکتے۔
عدالت نے حاضری معافی کی درخواست مسترد کرتے ہوئے عدم پیشی پر عبوری ضمانت خارج کردی۔
خیال رہے کہ چوہدری پرویز الٰہی کے خلاف انسدادِ دہشت گردی کی سنگین دفعات کے تحت مقدمہ درج کیا گیا تھا۔
