اسلام آباد:ملک بھر میں جشن آزادی کی تیاریوں کا آغازہوگیاہے ۔رواں سال یوم آزادی اس عزم کی تجدید کے ساتھ منایا جائیگا کہ دشمن کوہر میدان میں شکست دی جائیگی۔معرکہ حق کے شہیدوں کو خراج عقیدت۔غازیوں اور جانبازوں کو سلام پیش کیا جائے گا۔وطن عزیز کی نظریاتی اور جغرافیائی سرحدوں کی حفاظت اور ملک کے استحکام کیلئے قوم کا عزم پہلے سے زیادہ مضبوط اور تواناہے۔
اس سال یوم آزادی کو قومی جوش و جذبے، اتحاد اور ایک نئی ولولہ انگیز سوچ کے ساتھ ’’معرکہ حق‘‘ کے عنوان سے منایا جائے گا تاکہ عوام کے عزم، یکجہتی اور روشن مستقبل کی امید کو بھرپور انداز میں خراج تحسین پیش کیا جا سکے۔جشن آزادی کی یہ تقریبات دنیا کو یہ پیغام دیں گی کہ پاکستانی ایک خوددار، مضبوط اور پرعزم قوم ہیں جو اپنی خودمختاری پر کوئی سمجھوتہ نہیں کرینگے۔ہماری افواج، عوام، حکومت اور تمام ادارے وطن عزیز کی ترقی اورخوشحالی کیلئے متحدہیں۔
