اسلام آباد: برطانیہ کی ہائی کمشنر جین میریٹ نے نیشنل ڈیزاسٹر مینجمنٹ اتھارٹی (این ڈی ایم اے) ہیڈکوارٹرز کا دورہ کیا جہاں انہوں نے نیشنل ایمرجنسیز آپریشن سینٹر (این ای او سی)کا بھی معائنہ کیا۔
دورے کے دوران چیئرمین این ڈی ایم اے لیفٹیننٹ جنرل انعام حیدر ملک نے برطانوی ہائی کمشنر سے ملاقات کی اور انہیں پاکستان میں آفات سے نمٹنے کے لیے پیشگی تیاری، خطرات کے تدارک اور عوامی آگاہی کے نظام کے بارے میں تفصیلی بریفنگ دی۔
این ڈی ایم اے حکام نے وفد کو نیشنل ایمرجنسیز آپریشن سینٹر کے تکنیکی نظام اور صلاحیتی دائرہ کار سے بھی آگاہ کیا۔ اس موقع پر برطانوی ہائی کمشنر کو آفات سے نمٹنے اور ممکنہ خطرات کی پیشگی تشخیص کے لیے استعمال ہونے والے ڈیجیٹل پورٹلز اور جدید ٹیکنالوجی پر مبنی نظام کے بارے میں بھی بریفنگ دی گئی۔
چیئرمین این ڈی ایم اے نے ادارے کے قومی سطح پر آفات کے انتظام اور خطرات کے تدارک میں کلیدی کردار پر روشنی ڈالی جبکہ وفد کو 2026 کے دوران پاکستان اور دیگر ممالک کو درپیش ممکنہ خطرات کے حوالے سے بھی آگاہ کیا گیا۔
بریفنگ میں این ڈی ایم اے کی موبائل ایپلیکیشن، پیشگی وارننگ سسٹم اور ٹیکنالوجی پر مبنی اقدامات کا تفصیلی جائزہ بھی پیش کیا گیا۔
اس موقع پر برطانوی ہائی کمشنر جین میریٹ نے آفات سے نمٹنے اور خطرات کے تدارک کے لیے این ڈی ایم اے کے جدید اور مربوط نظام کو سراہتے ہوئے کہا کہ این ای او سی دنیا کے بہترین ایمرجنسی آپریشن سینٹرز میں سے ایک ہے۔
ملاقات میں پاکستان اور برطانیہ کے درمیان ڈیزاسٹر رسک ریڈکشن اور کلائمیٹ ریزیلینس کے شعبوں میں تعاون کو مزید فروغ دینے کے امکانات پر بھی تبادلہ خیال کیا گیا۔
