راولپنڈی:چیئرمین جوائنٹ چیفس آف سٹاف کمیٹی جنرل ساحر شمشاد مرزا نے ڈھاکہ میں بنگلہ دیش کے آرمی ہیڈ کوارٹرز کا دورہ کیا ۔آئی ایس پی آر کے مطابق جنرل ساحر شمشاد مرزا نے بنگلہ دیش کی فوج کے سربراہ جنرل وقار الزمان سے ملاقات کی ۔ملاقات میں فریقین نے دونوں ملکوں کی مسلح افواج کے درمیان تعاون مزید مضبوط بنانے پر زور دیا۔
آئی ایس پی آر کے مطابق ملاقات میں بدلتے ہوئے عالمی اور علاقائی سلامتی کی صورت حال پر تبادلہ خیال کیا گیا۔گفتگو میں مسلح افواج کے درمیان تربیت ،مشترکہ مشقیں اور انسداد دہشت گردی کے حوالے سے تجربات کا تبادلہ شامل تھا۔ملاقات میں ڈس انفارمیشن سے پیدا ہونے والے نئے چیلنجز کو مشترکہ مسئلہ قراردیتے ہوئے ان کے تدارک کے لیے باہمی تعاون اور مشترکہ کوششوں پر اتفاق کیا گیا۔
ملاقات میں فریقین نے دونوں ملکوں کے درمیان بڑھتے ہوئے دفاعی تعاون کی مثبت سمت کو سراہا اور فوجی قیادت کے باہمی دوروں کا سلسلہ جاری رکھنے پر بھی اتفاق کیا۔
