راولپنڈی: آئی سی سی چیمپئنز ٹرافی کے چھٹے میچ میں بنگلادیش کی جانب سے 237 رنز کے ہدف کے تعاقب میں نیوزی لینڈ نے 20اوورز میں 3 وکٹوں کے نقصان پر 94 رنز بنالئے ہیں
راولپنڈی کرکٹ سٹیڈیم میں کھیلے جارہے میچ میں نیوزی لینڈ نے ٹاس جیت کر بنگلادیش کو بیٹنگ کی دعوت دی، پہلے کھیلتے ہوئے بنگلادیش نے مقررہ 50 اوورز میں 9 وکٹوں کے نقصان پر 236 رنز بنائے۔
بنگلادیش کی جانب سے اننگز کا آغاز تنزید حسن اور کپتان نجم الحسن شانتو نے کیا تاہم تنزید حسن 45 کے مجموعی سکور پر 24 رنز بناکر آؤٹ ہوگئے جبکہ دوسری وکٹ مہدی حسن میراز کی گری جو 13 رنز بنا کر پویلین لوٹ گئے۔
بنگلادیش کی تیسری وکٹ 97 کے مجموعی سکور پر گری جب توحید ہردوئے 7 رنز بناکر چلتے بنے جبکہ مشفق الرحیم 2 اور محمود اللہ 4 رنز بناکر آؤٹ ہوگئے۔
بنگلادیش کی چھٹی وکٹ کپتان نجم الحسن شانتو کی گری جو 77 رنز بناکر کیچ تھما بیٹھے، رشاد حسین 26 ، ذاکر علی 45 جبکہ تسکین احمد 10 رنز بناکر پویلین لوٹے۔
نیوزی لینڈ کی طرف سے مائیکل بریسویل نے 4، ول او رورک نے 2، میٹ ہینری اور کائل جیمیسین نے ایک، ایک کھلاڑی کو آوٹ کیا۔
خیال رہے کہ بنگلا دیش کو اپنے پہلے میچ میں بھارت کے ہاتھوں شکست کا سامنا کرنا پڑا تھا جبکہ نیوزی لینڈ نے ابتدائی میچ میں میزبان پاکستان کو شکست دی تھی۔
نیوزی لینڈ پوائنٹس ٹیبل پر پہلے جبکہ بھارت دوسرے نمبر پر موجود ہے۔
