اسلام آباد:جماعت اسلامی کے زیراہتمام اسلام آباد میں فلسطینی بچوں کے ساتھ اظہار یکجہتی کے لیے بچوں کا غزہ مارچ۔۔ امیر جماعت اسلامی پاکستان سراج الحق نے کہا ہے کہ ہماری جدوجہد کا محور آزاد فلسطین کا قیام ہے، ہم ظلم کے مقابلے میں مل کر لڑیں گے۔۔ چار دن کی جنگ بندی فلسطین کی جیت اور اسرائیل کی شکست ہے۔ او آئی سی اسرائیل کو دہشتگرد ریاست ڈیکلیئر کرے۔
فلسطینی بچوں کے ساتھ اظہار یکجہتی کے لئے اسلام آباد میں ہونے والے بچوں کے غزہ مارچ سے خطاب کرتے ہوئے سراج الحق کا کہنا تھا کہ اسلام آباد میں بچوں کا اجتماع پیغام دے رہا ہے کہ وہ غزہ کے ساتھ ہیں، فیصل مسجد کے سامنے ہزاروں کا اجتماع ظالموں کیلئے موت کا پیغام ہے۔۔ ا?ج اسرائیل کی وجہ سے پورا غزہ ملبے کا ڈھیر اور بچوں کا قبرستان بن گیا ہے، تمام ظالموں اور وحشی درندوں کو اس دنیا میں سزا ملنی چاہیے۔
امیر جماعت اسلامی کا کہنا تھا کہ ترکی اور استنبول کے عوام بھی اسرائیلی ظلم کے خلاف کھڑے ہیں، لندن، واشنگٹن اور دنیا کے باضمیر انسان اہل غزہ کی سپورٹ میں کھڑے ہیں، افسوس ہے کہ عوام غزہ کے ساتھ ہیں جبکہ حکمران بزدلی کا مظاہرہ کر رہے ہیں۔چار دن کی جنگ بندی فلسطین کی جیت اور اسرائیل کی شکست ہے۔ او آئی سی اسرائیل کو دہشتگرد ریاست ڈیکلیئر کرے۔
غزہ مارچ مارچ میں ہزاروں بچوں نے شرکت کی۔ بچوں نے عالمی طاقتوں سے مطالبہ کیا کہ فلسطین کے بچوں کی نسل کشی بند کرائی جائے۔۔
سراج الحق نے کہا کہ کیا حکمرانوں کو کفن کے بغیر نعشیں نظر نہیں آ رہیں؟ صدر اور نگران وزیراعظم کو یہ مینڈیٹ کس نے دیا کہ فلسطینیوں کی حمایت کے بغیر دو ریاستی حل کی بات کریں۔۔ صدر پاکستان، وزیراعظم یا کسی اور کو یہ حق حاصل نہیں کہ وہ پاکستان کی قومی پالیسی کو تسلیم کرے، اگر ساری دنیا بھی اسرائیل کو تسلیم کر لے تو پاکستان کبھی اسرائیل کو تسلیم نہیں کرے گا۔
