صدرمملکت ،وزیراعظم کی کرسمس کے موقع مسیحی برادری کو مبارکباد،نیک تمناؤں کااظہار

اسلام آباد: صدرِ مملکت آصف علی زرداری اور وزیراعظم محمد شہباز شریف کی جانب سے کرسمس کے موقع مسیحی برادری کو مبارکباد پیش کی گئی ہے۔
صدرِ مملکت آصف علی زرداری نے بھی کرسمس کے موقع پر اپنے پیغام میں پاکستان اور دنیا بھر کی مسیحی برادری کو دلی مبارکباد پیش کی ہے۔
صدرِمملکت نے کہا ہے کہ کرسمس محبت، سخاوت، رحم، اتحاد اور امید کی ترغیب دلاتی ہے، آئینِ پاکستان تمام شہریوں کو بنیادی حقوق کی ضمانت دیتا ہے۔
آصف علی زرداری کا کہنا ہے کہ قائداعظم نے ایسے پاکستان کا تصور دیا جہاں تمام مذاہب کے لوگ برابری کی بنیاد پر ترقی کر سکیں، قومی یکجہتی اور ترقی کے لیے تمام شہریوں کے حقوق کی پاسداری ناگزیر ہے، کرسمس پر پاکستان کی ترقی میں مسیحی برادری کے کردار کا اعتراف کرتے ہیں۔
انہوں نے مزید کہا کہ پاکستان کی ترقی میں مسیحی برادری کا کردار ہماری قوم کے متنوع پن کا ثبوت ہے، یقینی بنانا ہوگا پاکستان میں ہر شخص کا احترام کیا جائے اور ہر پاکستانی شہری خود کو محفوظ تصور کرے۔
صدرِ مملکت نے اپنے پیغام میں یہ بھی کہا کہ دعا ہے کرسمس ہماری مسیحی برادری کے لیے مسرت، خوشحالی اور امید لے کر آئے۔
دوسری جانب وزیراعظم شہباز شریف نے کرسمس کے موقع پر اپنے پیغام میں کہا ہے کہ کرسمس پر ہمیں امن، بھائی چارے اور محبت کے پیغام پر غور کرنا چاہیے، حضرت عیسیٰ علیہ السلام نے ہمدردی، مہربانی اور حکمت جیسی اقدار کی تبلیغ کی۔
شہباز شریف نے کہا ہے کہ مسیحی برادری کے ملکی ترقی کے لیے مثالی تعاون کو خراج تحسین پیش کرتے ہیں، حکومت پاکستان تمام مذہبی برادریوں کے حقوق کے تحفظ کے لیے پرعزم ہے۔
انہوں نے مزید کہا کہ اس بات کو یقینی بناتے رہیں گے کہ تمام مذاہب کے لوگ آزادانہ اپنے عقائد پر عمل کر سکیں۔
وزیراعظم میاں محمد شہباز شریف نے یہ بھی کہا کہ دعا ہے یہ کرسمس ہر گھر میں خوشیاں اور برکتیں لائے، دعا ہے آنے والا سال ملک و قوم کے لیے امید، امن اور کامیابیوں سے بھرا ہو۔