اسلام آباد : ڈپٹی چیئرمین سینیٹ سیدال خان نے ایک اعلیٰ سطحی پارلیمانی وفد کے ہمراہ عوامی جمہوریہ چین کا دورہ کیا جس کا مقصد پاکستان اور چین کے دیرینہ برادرانہ تعلقات کو مزید مستحکم کرنا ہے۔
دورے کے دوران، ڈپٹی چیئرمین سینیٹ سیدال خان نے چین کے مقامی ٹی وی چینل کو ایک خصوصی انٹرویو دیا، جس میں انہوں نے دونوں ممالک کے مابین تعلقات کی تاریخی اہمیت اور باہمی اعتماد پر روشنی ڈالی۔
سیدال خان نے انٹرویو میں کہا کہ پاکستان اور چین آئرن برادرز ہیں ۔ دونوں ممالک نے ہر مشکل گھڑی میں ایک دوسرے کا بھرپور ساتھ دیا ہے اور عالمی سطح پر ہر اہم فورم پر شانہ بشانہ کھڑے رہے ہیں۔ اُن کا کہنا تھا کہ مشکل اور اچھے حالات میں دونوں ممالک نے باہمی احترام اور برادرانہ تعلقات کا مظاہرہ کیا ہے۔
سیدال خان نے مزید کہا کہ پاکستان اور چین کی قیادت اور عوام تعاون کے جذبے سے سرشار ہیں اور پارلیمانی، سفارتی اور عوامی روابط دونوں ممالک کے تعلقات کو مزید تقویت دے رہے ہیں۔ انہوں نے یاد دلایا کہ پاکستان میں زلزلوں، سیلاب اور پاک بھارت کشیدگی کے دوران چین نے ثابت قدمی کا مظاہرہ کیا ہے اور ہر مشکل گھڑی میں پاکستان کا ساتھ دیا ہے جو کہ قابلِ تحسین ہے۔
ڈپٹی چیئرمین سینیٹ نے پاکستان کی اقتصادی ترقی میں چین کے اہم کردار کو بھی سراہا اور کہا کہ سی پیک اور دیگرمنصوبوں سے خطے میں تجارت اور سرمایہ کاری کو فروغ ملے گا۔ پاکستان چین کے ساتھ اپنے تعلقات کو انتہائی قدر کی نگاہ سے دیکھتا ہے اور یہ تعلقات وقت کے ساتھ مزید مستحکم اور مضبوط ہو رہے ہیں۔
