کراچی: اداکارہ دنانیر مبین نے سوشل میڈیا پر تصاویر پر کیے جانے والے تبصروں کے حوالے سے کہا ہے کہ ہر تصویر کے پیچھے ایک حقیقی انسان ہوتا ہے، اس لیے رائے دیتے وقت نرمی اور مہربانی کا مظاہرہ کرنا چاہیے۔
انسٹاگرام پر شیئر کی گئی ایک تفصیلی پوسٹ میں دنانیر مبین نے اپنی جلد کے مسائل اور ایکنی کے تجربے پر کھل کر بات کی۔ انہوں نے بتایا کہ گزشتہ چند ماہ کے دوران انہیں جلدی مسائل کا سامنا رہا، جس میں مختلف عوامل جیسے میک اپ، روشنیوں کا دباؤ اور ہارمونز کی تبدیلی شامل رہے۔
اداکارہ کے مطابق اب ان کی جلد میں بہتری آ رہی ہے، تاہم اس دوران انہوں نے سوشل میڈیا پر نظر آنے والی مکمل طور پر فلٹر شدہ تصاویر اور حقیقی زندگی کے فرق پر بھی روشنی ڈالی۔
انہوں نے کہا کہ آن لائن دنیا میں اکثر لوگ یہ بھول جاتے ہیں کہ تصاویر کے پیچھے ایک عام انسان موجود ہوتا ہے، جس کے اپنے جذبات اور مشکلات ہوتی ہیں۔
دنانیر مبین نے مداحوں سے اپیل کی کہ سوشل میڈیا پر مثبت رویہ اپنایا جائے کیونکہ “تھوڑی سی مہربانی بہت فرق ڈال سکتی ہے”۔ اس حوالے سے اداکارہ ہانیہ عامر نے بھی ان کی پوسٹ کو انسٹاگرام اسٹوری پر شیئر کرتے ہوئے حمایت کا اظہار کیا۔
