پی آئی اے کے طیاروں پردفاعی نمائش آئیڈیاز2024 کا لوگو پینٹ کرادیا گیا

کراچی: قومی ائیر لائن (پی آئی اے )نے فضائی بیڑے میں شامل اہم طیاروں پردفاعی نمائش آئیڈیاز کا لوگو پینٹ کروادیا،اسلحے کی نمائش آئیڈیاز کا 12 واں ایڈیشن 19 تا22 نومبر کے درمیان ایکسپوسینٹر کراچی میں منعقد ہوگا۔

ذرائع کے مطابق قومی ایئرلائن انتظامیہ نے فضائی بیڑے میں ڈومیسٹک اور انٹرنیشنل فضائی آپریشن کے حامل بوئنگ 777 اور ائیر بس 320 کے 4 جہازوں کی باڈی پر لوگو پینٹ کروا دیے۔ نیرو باڈی اور وائیڈ باڈی طیارے ملکی و بین الاقوامی فضائی روٹس پر استعمال کیے جاتے ہیں۔

خیال رہے کہ 12 ویں آئیڈیاز 2024، اسلحے کی نمائش 19 تا22 نومبر کے دوران ایکسپوسینٹر کراچی میں منعقد ہوگی،اس نمائش میں دنیا بھر سے 45 سے زائد ممالک اپنے سامان حرب اور مندوبین و مبصرین کے ہمراہ شریک ہوتے ہیں، کئی ممالک کے فوجی سربراہان بھی دفاعی نمائش میں خصوصی طور پر شریک ہوتے ہیں۔