اسلام آباد:نائب وزیراعظم و وزیر خارجہ سینیٹر اسحاق ڈار نے متحدہ عرب امارات کے نائب وزیراعظم و وزیر خارجہ شیخ عبداللہ بن زاید سے ٹیلیفونک رابطہ کیا۔
ترجمان دفترخارجہ کے مطابق دونوں رہنماؤں کے درمیان خطے کی بدلتی ہوئی صورتحال پر تبادلہ خیال کیا گیا۔ اس موقع پر اسحاق ڈار نے امن اور استحکام کی اہمیت پر زور دیتے ہوئے فوری کشیدگی میں کمی کی ضرورت پر زور دیا اور کہا کہ مسائل کا حل صرف بات چیت اور سفارتکاری کے ذریعے ہی ممکن ہے۔
انہوں نے قیمتی انسانی جانوں کے ضیاع، بشمول تین پاکستانی شہریوں کی اموات پر گہرے دکھ اور افسوس کا اظہار کیا اور متحدہ عرب امارات کے ساتھ پاکستان کی مکمل یکجہتی کا اعادہ کیا۔
گفتگو کے دوران دونوں رہنماؤں نے عید کی مبارکباد کا بھی تبادلہ کیا اور باہمی رابطے جاری رکھنے پر اتفاق کیا۔
