اسلام آباد:وزیر توانائی اویس لغاری نے نیپرا فیصلے کو بجلی اصلاحات کا اہم سنگ میل قرار دے دیا۔اس اقدام سے سنگل بائر ماڈل سے مسابقتی بجلی مارکیٹ کی جانب منتقلی شروع ہوگی۔
وفاقی وزیر توانائی سردار اویس احمد خان لغاری نےنیپرا کی جانب سے مسابقتی مارکیٹ آپریشنز ڈیٹ کے اعلان پر اپنے بیان میں کہاہے کہ شفاف، مسابقتی،مارکیٹ بیسڈ پاور سسٹم حکومتی بڑی اصلاحات میں شامل ہے ۔800 میگاواٹ بجلی کی طلب کو مرحلہ وار دو طرفہ کنٹریکٹنگ پر منتقل کرنے کی منظوری دی گئی۔بجلی کی خریداری شفاف اور خودکار مسابقتی نیلامی کے ذریعے ہوگی۔
اویس لغاری نےکہا کہ مسابقتی مارکیٹ آپریشنز اعلان اصلاحات کی منصوبہ بندی سے عملی نفاذ کی جانب اہم پیش رفت ہے۔پاور سیکٹر میں شفافیت، بہتر گورننس اور سرمایہ کاری کے فروغ میں مدد ملے گی۔
وزارت توانائی نے قابلِ اعتماد، مؤثر اور مستقبل کے تقاضوں سے ہم آہنگ بجلی نظام بنانے کے عزم کااظہار کیاہے ۔پاورڈویژن کاکہناہے کہ مسابقتی بجلی مارکیٹ سے طویل مدتی معاشی ترقی اور صاف توانائی کو فروغ ملے گا۔
