نیویارک :نائب وزیراعظم و وزیر خارجہ سینیٹر محمد اسحاق ڈار نے اقوام متحدہ کی سلامتی کونسل کے اجلاس کے موقع پر، جو پاکستان کی صدارت میں منعقد ہوا، برطانیہ کے وزیر برائے افریقی امور، اقوام متحدہ، کامن ویلتھ اور کثیرالجہتی امور لارڈ کولنز آف ہائی بری سے ملاقات کی۔
ملاقات میں دونوں رہنماؤں نے معاشی، تجارتی اور پارلیمانی سطح پر پاک-برطانیہ تعلقات کو مزید مستحکم کرنے کے عزم کا اعادہ کیا، اور برطانیہ میں پاکستانی کمیونٹی کے مثبت اور تعمیری کردار کو سراہا۔
کثیرالجہتی امور پر گفتگو کرتے ہوئے لارڈ کولنز نے سلامتی کونسل کی صدارت کے دوران پاکستان کی جانب سے تنازعات کے پرامن حل کے طریقہ کار کو مؤثر بنانے میں ادا کیے گئے کردار کو سراہا۔
دونوں رہنماؤں نے علاقائی اور عالمی امور پر بھی تبادلہ خیال کیا، جن میں مقبوضہ جموں و کشمیر کی صورتحال بھی شامل تھی۔ اس کے ساتھ ساتھ انہوں نے غزہ میں جاری انسانی بحران پر گہری تشویش کا اظہار کیا اور 28 جولائی کو دو ریاستی حل سے متعلق بین الاقوامی کانفرنس کی اہمیت پر زور دیا۔
