کوئٹہ:بلوچستان کے مختلف علاقوں میں شدید برفباری اور سخت موسمی حالات کے باوجود پاک فوج ریلوے ٹریکس کی نگرانی پر مامور ہے۔ پاک فوج کے جوان ایک طرف شدید موسمی آزمائشوں اور دوسری جانب دہشتگردی کے ممکنہ خطرات کے باوجود عزم و حوصلے کے ساتھ اپنی ذمہ داریاں نبھا رہے ہیں۔
جعفر ایکسپریس اور بولان ایکسپریس کے مسافروں کی حفاظت کو یقینی بنانے کے لیے پاک فوج کے جوان برفباری میں بھی مسلسل ڈیوٹی انجام دے رہے ہیں اور ریلوے لائنوں و مسافر ٹرینوں کی سیکیورٹی پر کوئی سمجھوتہ نہیں کیا جا رہا۔
پاک فوج کے جوان اپنی جان کی پرواہ کیے بغیر عوام کے جان و مال کے تحفظ کے لیے ہر دم تیار ہیں اور سخت موسم و کٹھن حالات میں بھی ریلوے نظام کی حفاظت کا فریضہ سرانجام دے رہے ہیں، جو قوم کے لیے باعثِ فخر ہے۔
