منیلا:فلپائن کے وسطی صوبے سیبو میں تباہ کن زلزلے میں 69 افراد ہلاک اور سینکڑوں زخمی ہوگئے ہیں ۔
امریکی جیولوجیکل سروے کے مطابق ریکٹرسکیل پرزلزلے کی شدت 6.9ریکارڈ کی گئی ۔ زلزلے کی زیر ِ زمین گہرائی 10 کلو میٹر ریکارڈ کی گئی ۔زلزلہ مقامی وقت کے مطابق رات 10 بجے آیا۔ زلزلے کی گہرائی 10 کلو میٹر جبکہ مرکز بوگو شہر کے شمال مشرق میں 17 کلو میٹر کے فاصلے پر تھا۔
حکام کے مطابق زلزلے سے درجنوں عمارتیں زمین بوس ہوگئی ہیں ۔ صوبے بھر میں ہنگامی حالت نافذ کردی گئی ہے اور ملبے تلے دبے افراد کوبچانے کیلئے امدادی کارروائیاں جاری ہیں ۔ حکام نے ہلاکتوں میں اضافے کا خدشہ ظاہر کیا ہے ۔ زلزلے کے باعث باسکٹ بال میچ کے دوران اسپورٹس کمپلیکس گر گیا ۔ وسطی ساحلی علاقے میں زلزلے کے بعد کئی آفٹر شاکس بھی محسوس کئے گئے اور لوگ خوفزدہ ہو کر گھروں سے باہر نکل آئے۔حکام نے علاقے میں سکولز اور سرکاری دفاتر بند کرنے کا اعلان کر دیا ہے۔
