اسلام آباد:کابینہ کی اقتصادی رابطہ کمیٹی نے الیکٹرک وہیکلز پر سبسڈی اور ترسیلاتِ زر اسکیم کی ادائیگیوں کے لئے تکنیکی ضمنی گرانٹ کی منظوری دے دی ہے۔
اقتصادی رابطہ کمیٹی کا ورچوئل اجلاس وفاقی وزیر خزانہ محمد اورنگزیب کی زیر صدارت اسلام آباد میں ہوا۔
اسکیم کے لیے مالی سال 2025-26 میں 9 ارب روپے کا بجٹ مختص کیا جا چکا ہے۔ اس اسکیم میں سرکاری کالجوں کے نمایاں کارکردگی کے حامل طلبہ کو مفت الیکٹرک بائیکس دینے کا منصوبہ شامل ہے۔ منظور شدہ منصوبے کے تحت دو مراحل میں ایک لاکھ سولہ ہزارالیکٹرک بائیکس اور تین ہزار ایک سو سترالیکٹرک رکشے/لوڈرز فراہم کیے جائیں گے۔
کمیٹی نے مالی سال 2024-25 کے دوران ٹیلی گرافک ٹرانسفر چارجز ترغیبی اسکیم کے تحت 58.26 ارب روپے کے واجب الادا کلیمز کی ادائیگی کے لیے 30 ارب روپے کی تکنیکی ضمنی گرانٹ کی منظوری بھی دی۔
ای سی سی نے قائداعظم یونیورسٹی کے لیے 2 ارب روپے کی بیل آؤٹ گرانٹ اصولی طور پر منظور کر لی۔
