منڈی بہاء الدین:پاکستان پیپلز پارٹی (پی پی پی) کے رہنما قمر زمان کائرہ کا کہنا ہے کہ مسلم لیگ (ن) کے قائد اور سابق وزیراعظم نواز شریف کو لندن روانگی کے وقت سے ہی فیور دیا جا رہا ہے۔ پی پی سمیت کئی لوگوں کا شکوہ ہے کہ لیول پلیئنگ فیلڈ نہیں مل رہی۔
منڈی بہاء الدین میں میڈیا سے گفتگو کرتے ہوئے قمر زمان کائرہ نے کہا کہ کسی جماعت کو طاقت کے زور پر سیاسی عمل سے باہر نہیں کرنا چاہیے، پاکستان میں سب کو سیاست کرنے کا حق ملنا چاہیے۔
قمر زمان کائرہ نے کہا کہ پی ٹی آئی کے کچھ لوگ اگر کیسز میں ملوث ہیں تو کیسز کے جلد ٹرائل ہونے چاہئیں۔ جزا سزا کا فیصلہ عدالتوں سے ہونا چاہیے، کسی نے قانون توڑا ہے تو شفاف طریقے سے کارروائی کی جائے۔
انہوں نے مزید کہا کہ پیپلز پارٹی کسی جماعت سے سیٹ ایڈجسٹمنٹ نہیں کر رہی۔ پیپلز پارٹی نے عوام کے سہارے کے علاوہ کبھی سہارا نہیں لیا۔
