ریاض: وفاقی وزیرِ صحت سید مصطفیٰ کمال نے ریاض میں سعودی وزیرِ صحت سے ملاقات کی، جس میں دونوں ممالک کے درمیان صحت کے شعبے اور باہمی تعاون کے فروغ پر تفصیلی تبادلہ خیال کیا گیا۔ ترجمان وزارتِ صحت کے مطابق ملاقات میں پاکستان اور افغانستان میں انسدادِ پولیو کے اقدامات پر بھی بات چیت ہوئی۔
دونوں وزراء نے آئندہ منعقد کی جانے والی انسدادِ پولیو مہم کے حوالے سے بھی غور و خوض کیا اور باہمی اشتراکِ عمل کو مزید مضبوط بنانے پر اتفاق کیا۔وفاقی وزیرِ صحت سید مصطفیٰ کمال نے کہا کہ پاکستان اور سعودی عرب کے درمیان تاریخی اور برادرانہ تعلقات مضبوط بنیادوں پر قائم ہیں۔ انہوں نے کہا کہ پولیو کا خاتمہ حکومتِ پاکستان کی اولین ترجیحات میں شامل ہے، اور وزیرِ اعظم پاکستان کی قیادت میں اس مقصد کے لیے مکمل یکسوئی کے ساتھ اقدامات جاری ہیں۔
انہوں نے بتایا کہ سال 2025 کے دوران اب تک چار قومی انسدادِ پولیو مہمات کامیابی سے مکمل کی جا چکی ہیں، جن کے دوران 45 ملین بچوں تک پولیو ویکسین پہنچائی گئی ہے۔ ان مہمات کے نتیجے میں ملک میں پولیو کے کیسز میں نمایاں کمی ریکارڈ کی گئی ہے۔سید مصطفیٰ کمال نے کہا کہ پولیو کے خلاف جدوجہد میں نمایاں پیش رفت کے باوجود، مشن ابھی مکمل نہیں ہوا اور حکومت اس مرض کے مکمل خاتمے کے لیے پرعزم ہے۔
ترجمان وزارتِ صحت کے مطابق سعودی وفد نے پاکستان کی جانب سے انسدادِ پولیو کے لیے اٹھائے گئے اقدامات کو سراہا اور آئندہ بھی ہر ممکن تعاون جاری رکھنے کی یقین دہانی کروائی۔
