واشنگٹن :وزیر خزانہ محمد اورنگزیب نے امریکہ کے ساتھ جاری تجارتی بات چیت اور مذاکرات کو انتہائی مثبت اور تعمیری قرار دیا ہے۔ انہوں نے یہ بات امریکہ کے وزیر تجارت ہاورڈ لوٹنک اور تجارتی نمائندے سفیر جیمیسن گرئیر کے ساتھ واشنگٹن میں ملاقات کے بعد جاری کیے گئے ویڈیو بیان میں کہی۔
وزیر خزانہ نے کہا کہ امریکہ پاکستان کا سب سے بڑا تجارتی شراکت دار ہے اور اس شراکت داری کو مزید مضبوط بنانے کے لیے دونوں ممالک یکساں مثبت جذبے سے آگے بڑھ رہے ہیں۔ انہوں نے اس بات پر زور دیا کہ موجودہ تجارتی تعلقات کو وسعت دینے اور پاکستان-امریکہ تعلقات کو ایک نئی سطح پر لے جانے کی ضرورت ہے، جس سے سرمایہ کاری کے شعبے میں حقیقی تبدیلی آئے گی۔
محمد اورنگزیب نے کہا کہ سرمایہ کاری کے لیے جن شعبوں کی نشاندہی کی گئی ہے، ان میں معدنیات، کان کنی، مصنوعی ذہانت، ڈیجیٹل انفراسٹرکچر اور کرپٹو کرنسی شامل ہیں۔ انہوں نے کہا کہ یہ سرمایہ کاری پاکستان اور امریکہ کے درمیان اقتصادی تعلقات کو مضبوط اور حقیقی تبدیلی کی جانب لے جائے گی۔
