پشاور: سابق وزیر صحت خیبر پختون خوا اور لکی مروت سے منتخب ایم پی اے ہشام انعام اللہ نے تحریک انصاف چھوڑنے کا اعلان کرتے ہوئے کہا ہے کہ اپنے حلقے کے عوام کی وجہ سے مجھے عزت ملی، میں نہیں چاہتا کہ غداروں کی صفت میں شامل ہوں۔
سابق وزیر صحت خیبر پختون خوا اور لکی مروت سے منتخب ایم پی اے ہشام انعام اللہ نے پریس کانفرنس کرتے ہوئے کہا کہ سیاست میں وزارت کے لیے نہیں آیا، جنہوں نے دفاع کا حلف لیا ہے ان کے خلاف کبھی نہیں جاسکتا، نو مئی کے واقعات کے بعد میں پاکستان تحریک انصاف کے ساتھ منسلک ہونا اپنی توہین سمجھتا ہوں۔
ہشام انعام اللہ نے کہا کہ پاکستان تحریک انصاف کی بنیادی رکنیت سے مستعفی ہوتا ہوں میں کسی کے دباؤ میں آکر یہ فیصلہ نہیں کررہا، اپنے حلقے کے عوام کی وجہ سے مجھے عزت ملی، میں نہیں چاہتا کہ غداروں کی صفت میں شامل ہوں۔
انہوں نے کہا کہ پی ٹی آئی کے کچھ شرپسند عناصر نے پاکستان کے وقار کو مجروح کیا، قومی ہیروز کے مجسمے، جناح ہاؤس کو جلانا قابل مذمت ہے۔
ہشام انعام نے مزید کہا کہ عمران خان اور پارٹی کے کچھ مخصوص افراد کھلے عام ریاست اور ریاستی اداروں کے ساتھ ٹکر پر اتر آئے ہیں جو کہ غلط ہے۔
