پاکستان نے بٹ کوائن مائننگ اور مصنوعی ذہانت (AI) کے ڈیٹا سینٹرز کے لیے دو ہزار میگاواٹ بجلی مختص کرنے کا فیصلہ کیا ہے، جو ملکی ڈیجیٹل انفرااسٹرکچر کو مضبوط بنانے کے قومی منصوبے کا پہلا مرحلہ ہے۔ وزارت خزانہ کی جانب سے اس اہم قدم کا اعلان کرتے ہوئے بتایا گیا ہے کہ اس حکمت عملی کا مقصد جدید ٹیکنالوجی کے شعبے میں توانائی کی فراہمی کو یقینی بنانا اور غیر ملکی سرمایہ کاری کو پاکستان کی جانب متوجہ کرنا ہے۔
اس منصوبے کے تحت اضافی بجلی بٹ کوائن مائننگ اور جدید ڈیجیٹل ٹیکنالوجیز کے استعمال میں لائی جائے گی، جس کی نگرانی پاکستان کرپٹو کونسل کرے گی۔ حکومتی حکمت عملی کے مطابق، یہ اقدام نہ صرف ٹیکنالوجی سیکٹر میں روزگار کے نئے مواقع پیدا کرے گا بلکہ معیشت کو ڈیجیٹل اور جدید خطوط پر استوار کرنے میں بھی مددگار ثابت ہوگا۔
معاشی ماہرین کا کہنا ہے کہ بٹ کوائن مائننگ اور اے آئی ٹیکنالوجی سے قومی سلامتی کو بھی نئی جہتیں ملیں گی اور یہ جدید ڈیجیٹل منصوبے ملک کی معاشی استعداد کو مزید مضبوط بنائیں گے۔
انہوں نے مزید کہا کہ ڈیجیٹل انفرااسٹرکچر ملکی خودمختاری کو بڑھانے میں کلیدی کردار ادا کرے گا۔
پاکستانی حکومت کی یہ کوشش ملک کو ٹیکنالوجی کے میدان میں ایک عالمی حریف بنانے اور معیشت کو ڈیجیٹل دور کے تقاضوں کے مطابق ڈھالنے کی جانب ایک اہم قدم تصور کی جا رہی ہے۔
