لاہور: مسلم لیگ ن کے صدر نواز شریف کی ایس سی او کانفرنس کی کوریج کیلیے آئے بھارتی صحافیوں کے وفد سے ملاقات ہوئی جس میں انہوں نے پاک بھارت کرکٹ اور دونوں ممالک کے تعلقات کی بحالی پر اپنے خیالات کا اظہار کیا۔
لاہور میں بھارتی صحافیوں کے وفد نے نواز شریف سے ملاقات کی اس موقع پر وزیراعلیٰ پنجاب مریم نواز بھی موجود تھیں۔ پڑوسی ملک کے صحافیوں سے گفتگو میں نواز شریف نے کہا کہ ایس سی او کانفرنس سے پاکستان اور بھارت کے تعلقات کی اچھی شروعات ہو سکتی ہیں، پاک بھارت تعلقات بہتر ہوجائیں تو بہت کچھ بہتر ہوسکتا ہے۔
انہوں نے کہا کہ بھارتی کرکٹ ٹیم کو چیمئنز ٹرافی کھیلنے کے لئے پاکستان آنا چاہیے، بھارتی ٹیم سے پوچھیں گے تو وہ بھی کہیں گے کہ ہم پاکستان جا کر کھیلنا چاہتے ہیں۔ نواز شریف نے کہا کہ شنگھائی تعاون تنظیم کانفرنس میں اگر بھارتی وزیراعظم خود شریک ہوتے تو اچھا تھا۔
نواز شریف نے کہا کہ دونوں ممالک کا ماضی بہت تلخ رہا ہے، آگے دیکھیے کیا ہوتا ہے۔ اس موقع پر وزیراعلیٰ پنجاب مریم نواز نے بھارتی صحافیوں سے گفتگو کرتے ہوئے کہا کہ میں بھی بھارتی پنجاب جانا چاہتی ہوں تاکہ فرق دیکھ سکوں، پاکستانی پنجاب اور بھارتی پنجاب دونوں ایک دوسرے سے بہت کچھ سیکھ سکتے ہیں۔
