اگر یہ بانی پی ٹی آئی کے ساتھ جیل میں بدتمیزی کرتے ہیں تو عام انسانوں کے ساتھ کیا سلوک ہوتا ہوگا،علیمہ خان

راولپنڈی:بانی تحریک انصاف کی ہمشیرہ علیمہ خان کا کہنا ہے کہ سپرنٹنڈنٹ جیل نے بانی پی ٹی آئی سے بدتمیزی کی ہے، اگر سابق وزیراعظم کے ساتھ یہ سلوک کرتے ہیں تو عام قیدیوں کے ساتھ کیا ہوتا ہوگا۔

اڈیالہ جیل کے باہر میڈیا سے گفتگو کرتے ہوئے علیمہ خان کا مزید کہنا تھا کہ آج ایک واقعہ آج کورٹ روم میں ہوا ہے، بانی پی ٹی آئی میڈیا سے بات کررہے تھے، سپرنٹنڈنٹ اڈیالہ جیل نے بانی پی ٹی آئی سے بدتمیزی کی۔

علیمہ خان نے کہا کہ سپرنٹنڈنٹ سے بدتمیزی کی وجہ پوچھی تو اس نے کہا کہ بانی پی ٹی آئی نے مجھے تم کہا ہے۔

ان کا کہنا تھا کہ بانی پی ٹی آئی اچھے انداز میں جیل میں رہتے ہیں، یہ سب حمزہ شہباز کی ملازمت کرتے ہیں جو ان کو دھکے بھی دیتا ہے، اگر بانی پی ٹی آئی کے ساتھ جیل میں بدتمیزی کرتے ہیں تو عام انسانوں کے ساتھ کیسے ہوتا ہوگا۔

انہوں نےمزیدکہا کہ جج دلاور نے فیصلہ دیا تھا لیکن ہائی کورٹ نے معطل کردیا تھا، سپریم کورٹ میں 3 ہفتے سے درخواست لگی ہے، چیف جسٹس کو کہہ سکتے ہیں، آپ جلدی سے پٹیشن سنیں۔

علیمہ خان نے کہا کہ آپ سے اپیل کرتے ہیں بانی پی ٹی آئی کے خلاف سزا معطلی کی درخواست سن لیں، تاکہ بانی پی ٹی آئی کی نااہلی ختم ہوسکے اور الیکشن میں حصہ لے سکیں، ہم چاہتے ہیں یہ اپیل سنی جائے اور پورا ملک اس سماعت کو دیکھے۔