ن لیگ کے مسودے میں وفاقی آئینی عدالت ہے پیپلز پارٹی صوبوں میں بھی چاہتی ہے، بلاول بھٹو

اسلام آباد: پاکستان پیپلزپارٹی کے چیئرمین بلاول بھٹو نے کہا ہے کہ ہم چاہتے ہیں کہ وفاق کے ساتھ صوبائی سطح پر بھی معاملات چلانے کیلئے آئینی عدالت قائم کی جائے جبکہ یہ چیز ن لیگ کے مسودے میں شامل نہیں ہے۔

نجی ٹی وی پروگرام میں گفتگو کرتے ہوئے بلاول بھٹو زرداری نے کہا کہ امید رکھنی چاہیے کہ آئینی ترامیم پر اتفاق رائے پیدا ہو جائے گا، سیاسی جماعتوں کا کام یہی ہے کہ اتفاق رائے سے مسائل کا حل نکالیں۔

انہوں نے کہا کہ میں پر امید ہوں کہ اتفاق رائے سے مسودہ بنا سکیں گے، جہاں تک جے یو آئی اور پیپلز پارٹی کے ڈرافٹس ہیں ان میں کوئی بڑا فاصلہ نہیں ہے، ان شاء اللہ ہم آگے بڑھ کر سیاسی جماعتوں میں اتفاق رائے پیدا کریں گے۔

بلاول بھٹو نے کہا کہ پیپلزپارٹی نے تو آئینی ترمیم کا مسودہ بہت پہلے بنایا اور پھر ہم نے اسے حکومت ، مولانا فضل الرحمان کو بھی بھیجا جبکہ آج کے اجلاس میں بھی مسودہ پیش کیا۔ پیپلز پارٹی کی اصل تجویز یہ تھی کہ آئینی عدالت صوبائی سطح پر بھی ہو، ہمارا پہلے دن سے یہی موقف رہا ہے کہ صوبائی سطح پر آئینی معاملات کے لیے باقاعدہ عدالت بنے، ن لیگ کے مسودے میں وفاق کی سطح پر آئینی عدالت کا ذکر ہے صوبائی سطح پر نہیں ہے۔