اسلام آباد:صدر آصف علی زرداری سے نائب وزیراعظم اسحاق ڈار اور اسپیکر قومی اسمبلی سردار ایاز صادق نے نواب شاہ میں اہم ملاقات کی، جس میں ملک کی مجموعی سیکیورٹی، سیاسی صورتحال اور حالیہ علاقائی و بین الاقوامی پیش رفت پر تفصیل سے تبادلہ خیال کیا گیا۔ اس ملاقات کا مقصد ملک کی موجودہ سیاسی اور سیکیورٹی صورتحال کو بہتر بنانے کے لیے مشترکہ حکمت عملی تیار کرنا تھا۔
سینیٹر اسحاق ڈار نے صدر مملکت کو اقوام متحدہ کی جنرل اسمبلی کے اجلاس میں اپنی مصروفیات سے آگاہ کیا اور عالمی رہنماؤں سے ہونے والی ملاقاتوں پر بریفنگ دی۔ انہوں نے عالمی اور علاقائی مسائل کے حل کے حوالے سے اپنا نقطہ نظر بھی پیش کیا، جس میں عالمی سطح پر پاکستان کے مفادات کا تحفظ اور علاقائی امن کی اہمیت پر زور دیا گیا۔
ملاقات میں وفاقی وزیر داخلہ محسن نقوی بھی شریک تھے، جنہوں نے ملک میں سیکیورٹی کی صورتحال اور داخلی مسائل کے حوالے سے صدر زرداری کو آگاہ کیا۔ اس اہم ملاقات میں ملک کے سیاسی مستقبل کے حوالے سے بھی اہم فیصلے کیے گئے اور مشاورت کی گئی۔
