اسرائیل کا ایران پر حملہ ، چین کا ردعمل بھی سامنے آگیا

بیجنگ: چین نے ایران کی موجودہ سیکیورٹی صورتحال سنگین اور پیچیدہ قرار دیتے ہوئے چینی شہریوں پر زور دیا کہ وہ پیش رفت پر گہری نظر رکھیں۔
تفصیلات کے مطابق اسرائیل کی جانب سے ایران کے حملے کے بعد چین کے سفارت خانے نے کہا کہایران کی موجودہ سیکیورٹی صورتحال سنگین اور پیچیدہ ہے۔
چینی سفارت خانے نے ایران میں موجود چینی شہریوں پر زور دیا کہ وہ پیش رفت پر گہری نظر رکھیں اور اپنی حفاظتی احتیاطی تدابیر کو تیز کریں، ساتھ ہی غیر ضروری باہر جانے سے گریز کریں۔
اس سے قبل سعودی عرب نے ایران پر اسرائیلی جارحیت کی شدید مذمت کرتے ہوئے اقوام متحدہ سے فوری اقدام کا مطالبہ کیا ہے۔
۔۔
سعودی وزرات خارجہ کا کہنا ہے اسرائیلی حملہ ایران کی خودمختاری اور سلامتی پر حملہ ہے، اسرائیل نے بین الاقوامی قوانین کی بھی خلاف ورزی کی۔ یہ گھناؤنے حملے ناقابلِ قبول ہیں۔
اقوامِ متحدہ کی سلامتی کونسل اور بین الاقوامی برادری کی ذمہ داری ہے کہ وہ اس جارحیت کو فوری طور پر روکنے کیلئے موٴثر اقدامات کریں۔
اقوامِ متحدہ نے بھی ایران کے جوہری تنصیبات پراسرائیلی حملوں پر تشویش کا اظہارکیا، سیکریٹری جنرل انتونیوگوئتریس کا کہنا تھا کہ تنازع سے بچنے کیلئے تحمل سے کام لیا جائے۔