اسلام آباد: پاکستان دفتر خارجہ کی خاتون ترجمان ممتاز زہرا بلوچ نے غزہ کے شہر رفح پر اسرائیل کی فوجی جارحیت کی مذمت کی ہے۔
دفتر خارجہ کی ترجمان ممتاز زہرا بلوچ نے کہا ہے کہ رفح میں اسرائیل کی جارحیت عالمی عدالت انصاف کی تجویز کردہ عارضی اقدامات کی خلاف ورزی ہے، اس جارحیت سے غزہ میں انسانی تباہی میں مزید اضافہ ہوگا۔
ترجمان کا کہنا تھا کہ عالمی برادری اور اقوام متحدہ کی سلامتی کونسل اسرائیلی جارحیت رکوانے کیلئے اقدمات کرے، عالمی برادری سے مطالبہ کرتے ہیں انسانیت کیخلاف جرائم کو فوری بند کرایا جائے۔
ممتاز زہرا بلوچ نے کہا کہ اسرائیلی جارحیت سے گزشتہ 4 مہینوں کے دوران ہونے والی انسانی تباہی میں مزید اضافہ ہوگا، ایسے اقدامات ممکنہ جنگ بندی کیلئے جاری کوششوں کو خطرے میں ڈال دیں گے۔
