عدت کے دوران نکاح کیس کا تحریری حکم نامہ جاری

راولپنڈی :غیر شرعی نکاح کیس کا تحریری حکم نامہ جاری کردیاگیا، بانی پی ٹی آئی اور بشری بی بی کے خلاف ناجائز تعلقات کے الزامات کا کیس ختم، عدالت نے چارج شیٹ میں سیکشن 496 بی کے الزامات کا کیس ڈراپ کردیا۔

سینئر سول جج قدرت اللہ نے عدت کے دوران نکاح کیس کا تحریری حکم نامہ جاری کردیا ہے، جس میں بانی پی ٹی آئی اور بشری بی بی کے خلاف صرف عدت میں نکاح کی حد تک فرد جرم عائد ہوا ہے، 18 جنوری کو عدالت نے استغاثہ کے گواہوں کو طلب کر رکھا ہے، پاکپتن سے خاور مانیکا کے ملازم لطیف گواہی دی تھی۔

حکم نامہ میں کہا گیا کہ قانونی طور پر سیکشن 496 بی میں دو گواہوں کی ضرورت ہوتی ہے یہاں ایک ہے، عدالت 496 بی کی حد چارج ڈراپ کر رہی ہے، بانی پی ٹی آئی اور بشری بی بی پر صرف 496 کا چارج عائد کیا جاتا ہے۔

گواہ لطیف نے 6 سال قبل کے واقعات کے الزامات بانی پی ٹی آئی اور بشری بی بی پر لگائے تھے، عدت میں نکاح کے کیس کی مزید سماعت 18 جنوری کو ہو گی۔