ماسکو:5 اگست، یومِ استحصالِ کشمیر کے موقع پر دنیا بھر کی طرح روس کے دارالحکومت ماسکو میں بھی کشمیری عوام سے اظہارِ یکجہتی کے لیے پاکستانی سفارتخانے میں ایک پروقار تقریب کا انعقاد کیا گیا۔
ماسکو میں واقع پاکستانی سفارتخانے میں یومِ استحصالِ کشمیر پر منعقدہ تقریب کا آغاز تلاوتِ کلامِ پاک سے ہوا، جس کے بعد پاکستان اور کشمیر کے قومی ترانے بجائے گئے۔
تقریب میں بڑی تعداد میں پاکستانی و کشمیری کمیونٹی کے افراد نے شرکت کی اور مقبوضہ جموں و کشمیر میں بھارتی مظالم کے خلاف آواز بلند کی۔
سفیرِ پاکستان خالد جمالی نے کہاکہ ہم کشمیری بھائیوں کے ساتھ کھڑے ہیں، ان کی قربانیوں کو سلام پیش کرتے ہیں اور دنیا کو یاد دلاتے ہیں کہ حقِ خود ارادیت کشمیریوں کا بنیادی حق ہے۔
تقریب میں پاکستانی سفیر خالد جمالی نے وزیرِ اعظم پاکستان کا خصوصی پیغام پڑھ کر سنایا، جس میں کشمیری عوام کی جدوجہدِ آزادی کو خراجِ تحسین پیش کیا گیا اور عالمی برادری سے اپیل کی گئی کہ وہ بھارتی مظالم کا نوٹس لے۔
تقریب کے اختتام پر کشمیری شہداء کے ایصالِ ثواب کے لیے دعا کی گئی اور اس عزم کا اعادہ کیا گیا کہ کشمیریوں کی جدوجہدِ آزادی کی مکمل حمایت جاری رہے گی۔
