اسلام آباد: وفاقی وزیر داخلہ سید محسن رضا نقوی نے نیشنل ڈیزاسٹر مینجمنٹ اتھارٹی (این ڈی ایم اے) ہیڈکوارٹرز میں قائم نیشنل ایمرجنسیز آپریشن سینٹر (این ای او سی) کا دورہ کیا۔
اس موقع پر این ڈی ایم اے کی ٹیم نے سال 2026 کے دوران پاکستان اور دیگر ممالک کو درپیش ممکنہ خطرات کے حوالے سے تفصیلی بریفنگ دی۔
وزیر داخلہ کو این ڈی ایم اے کے پیشگی آگاہی اور انتباہ کے لیے فعال جدید نظام سے بھی آگاہ کیا گیا۔
بریفنگ میں پاکستان لینز کی روشنی میں 2026 کے دوران ملک کو لاحق ممکنہ موسمیاتی خطرات اور ان سے نمٹنے کے لیے کیے جانے والے پیشگی اقدامات پر بھی روشنی ڈالی گئی۔
این ڈی ایم اے حکام نے تمام خطرات کی پیشگی تشخیص اور نگرانی کے لیے فعال ڈیجیٹل پورٹلز اور آفات سے متعلق عالمی معیار کی موبائل ایپلیکیشن کے بارے میں بھی آگاہ کیا۔
وفاقی وزیر داخلہ نے این ڈی ایم اے کی آفات سے نمٹنے کی حکمت عملی اور مختلف اداروں کے درمیان مؤثر رابطہ کاری کو سراہا۔
اس موقع پر وزیر داخلہ نے این ڈی ایم اے اور سول ڈیفنس کے درمیان اشتراک پر زور دیتے ہوئے کہا کہ آفات سے نمٹنے کے لیے مشترکہ لائحہ عمل اور تربیتی کورسز کے انعقاد میں سول ڈیفنس اکیڈمی کی خدمات بھی حاصل کی جانی چاہئیں۔
وفاقی وزیر داخلہ نے این ڈی ایم اے میں قائم سینٹر آف ایکسیلینس کا بھی دورہ کیا اور پاکستان میں آفات سے نمٹنے کے نظام کو مزید فعال اور متحرک بنانے کے عزم کا اعادہ کیا۔
