شاماخی:وفاقی وزیر برائے موسمیاتی تبدیلی و ماحولیاتی ہم آہنگی، ڈاکٹر مصدق ملک نے آذربائیجان کے شہر شاماخی میں منعقدہ سربراہانِ وفود (HOD) سطح کے اجلاس میں پاکستان کی نمائندگی کی۔ یہ اجلاس اہم ماحولیاتی امور پر عالمی قیادت کو یکجا کرنے کے لیے منعقد کیا گیا۔
اجلاس کے دوران اپنے خطاب میں ڈاکٹر مصدق ملک نے موسمیاتی انصاف، مساوات، اور عالمی شمال و جنوب کے مابین مضبوط تر تعاون کی فوری ضرورت پر زور دیا۔ انہوں نے پاکستان کی ماحولیاتی کمزوری کو اجاگر کرتے ہوئے ترقی پذیر ممالک کے لیے موسمیاتی مالیاتی معاونت، موافقت میں مدد، اور جدید ٹیکنالوجی کی منتقلی کو ناگزیر قرار دیا۔
وزیرِ موصوف نے ترقی یافتہ ممالک سے مطالبہ کیا کہ وہ پیرس معاہدے کے تحت کیے گئے اپنے وعدوں کی پاسداری کریں اور موسمیاتی مالیات کو شفاف، جامع اور ہر ملک کے لیے بآسانی قابلِ رسائی بنایا جائے۔
انہوں نے اس بات کا اعادہ کیا کہ پاکستان ایک پائیدار اور ماحولیاتی لحاظ سے مضبوط مستقبل کے قیام کے لیے پرعزم ہے اور عالمی ماحولیاتی پالیسی کی تشکیل میں فعال کردار ادا کرتا رہے گا۔
یہ اجلاس اعتماد سازی اور عالمی اتفاقِ رائے کے فروغ کے لیے ایک اہم موقع ثابت ہوا، جس میں پاکستان نے مؤثر اور منصفانہ عالمی ماحولیاتی فریم ورک کے لیے اپنی حمایت دوہرائی۔
