ملتان: انگلینڈ کے خلاف دوسرے ٹیسٹ میچ کے دوسرے روز پاکستان کی پوری ٹیم 366 رنز پر آؤٹ ہو گئی جبکہ انگلینڈ نے اپنی پہلی اننگ میں 6 وکٹوں کے نقصان پر 239 رنز بنا لیے۔
انگلینڈ نے اپنی پہلی اننگ کا جارحانہ آغاز کیا اور 12 اوورز میں 73 رنز کی اور اوپنرز نے 73 رنز کی شراکت قائم کی تاہم 13ویں اوور میں انگلینڈ کی پہلی وکٹ گر گئی، انگلش اوپنر زیک کراؤلی 27 رنز بنا کر نعمان علی گیند پر محمد رضوان کے ہاتھوں کیچ دے بیٹھے۔
انگلش بلے باز بین ڈکٹ نے 114 رنز کی جارحانہ اننگز کھیلی اور ساجد خان کی گیند پر سلمان آغا کے ہاتھوں کیچ آؤٹ ہوئے، کپتان اولی پوپ نے 29، جوئے روٹ نے 34، ہیری بروک نے 9 اور بین سٹوک نے ایک رن سکور کیا۔
پاکستان کی جانب سے ساجد خان نے 4 اور نعمان علی نے 2 انگلش بلے بازوں کو پویلین کی راہ دکھائی۔
انگلینڈ کی جانب سے جیمی سمتھ 12 اور برائیڈن کریز ایک رن کے ساتھ کریز پر موجود ہیں، انگلش ٹیم کل 239 رنز 6 وکٹ کے نقصان سے اپنی اننگ آگے بڑھائے گی۔
دوسرا روز
ملتان میں کرکٹ سٹیڈیم میں کھیلے جارہے دوسرے ٹیسٹ میچ کے دوسرے روز پاکستان نے اپنی ادھوری پہلی اننگز کا آغاز 5 وکٹوں کے نقصان پر 259 رنز پر کیا تو محض 5 رنز کے اضافے پر وکٹ کیپر بیٹر محمد رضوان 41 رنز بناکر آؤٹ ہو گئے جبکہ بعدازاں آغا سلمان بھی زیادہ دیر تک کریز پر نہ رک سکے اور 31 رنز بنا پویلین لوٹ گئے۔
قومی ٹیم کو آٹھواں نقصان ساجد خان کی شکل میں اٹھانا پڑا، آف سپنر 2 رنز بنا کر آؤٹ ہوئے بعدازاں عامر جمال اور نعمان علی نے 9 ویں وکٹ کی شراکت میں 49 رنز کی پارٹنرشپ قائم کی تاہم عامر جمال 37 رنز بناکر آؤٹ ہوگئے مگر ان کے بعد نعمان علی بھی کریز نہ سنبھال سکے اور 32 رنز بنا کر جیک لیچ کا شکار بن کر پویلین چلتے بنے، یوں پاکستان نے اپنی پہلی اننگ میں 366 رنز بنائے۔
پہلی اننگز میں انگلینڈ کی جانب سے جیک لیچ نے 4، برائیڈن کارس نے 3، میتھیو پوٹس نے 2 جبکہ شعیب بشیر ایک وکٹ حاصل کی۔
پہلا روز
ملتان کرکٹ سٹیڈیم میں کھیلے جارہے سیریز کے دوسرے ٹیسٹ میچ میں پاکستان کی جانب سے اننگز کا آغاز صائم ایوب اور عبداللہ شفیق نے کیا۔
اوپنر بلے باز عبداللہ شفیق ایک مرتبہ پھر ناکامی کی تصویر بنے نظر آئے اور محض 7 کے انفرادی سکور پر وکٹ گنوا بیٹھے جبکہ کپتان شان مسعود بھی لمبی اننگز کھیلنے میں کامیاب نہ ہوسکے اور صرف 3 رنز بنا کر پویلین لوٹ گئے، انگلینڈ کی جانب سے دونوں وکٹیں جیک لیچ نے حاصل کیں۔
2 وکٹیں جلد گرنے کے بعد صائم ایوب نے کامران غلام کیساتھ مل کر ٹیم کی پوزیشن بہتر کی اور دفاعی انداز میں کھیلتے ہوئے 77 رنز بنائے تاہم بعدازاں وہ میتھیو پوٹس کی گیند پر بین سٹوکس کو کیچ تھما بیٹھے۔
نئے آنے والے بلے باز سعود شکیل بھی وکٹ پر کچھ دیر کے مہمان ثابت ہوئے اور محض 4 رنز بنا کر پویلین چلتے بنے جبکہ ڈیبیو ٹیسٹ میچ میں سنچری سکور کرنے والے کامران غلام 118 رنز بنا کر شعیب بشیر کا شکار بنے۔
پہلے روز کے اختتام پر پاکستان نے 5 وکٹوں کے نقصان پر 259 رنز بنا لیے تھے جبکہ وکٹ کیپر بلے باز محمد رضوان 37 اور سلمان آغا 5 رنز کے ساتھ وکٹ پر موجود تھے۔
انگلینڈ کی جانب سے جیک لیچ نے 2 جبکہ شعیب بشیر، میتھیو پوٹس اور برائیڈن کارس نے ایک ایک وکٹ حاصل کی۔
قبل ازیں قومی ٹیم کے کپتان شان مسعود نے ٹاس جیت کر پہلے بیٹنگ کرنے کا فیصلہ کیا، انہوں نے کہا کہ کوشش کریں گے کہ مہمان ٹیم کیخلاف جلد بڑا سکور کھڑا کرکے انہیں انڈر پریشر لائیں۔
اس موقع پر انگلش ٹیم کے کپتان بین سٹوکس نے کہا کہ پہلے ٹیسٹ میں کامیابی کے بعد ٹیم کا مورال بلند ہے، دوسرا ٹیسٹ بھی جیت کر سیریز اپنے نام کرنا چاہتے ہیں۔
