نیوزی لینڈ کی ٹیم آئی سی سی ٹی ٹوئنٹی ورلڈ کپ کے فائنل میں پہنچ گئی

نیوزی لینڈ کی ٹیم آئی سی سی ٹی ٹوئنٹی ورلڈ کپ کے فائنل میں پہنچ گئی
فوٹو:فائل
کولکتہ :نیوزی لینڈ کی ٹیم آئی سی سی ٹی ٹوئنٹی ورلڈ کپ کے فائنل میں پہنچ گئی ہے۔

کولکتہ میں کھیلے گئے پہلے سیمی فائنل میں نیوزی لینڈ نے جنوبی افریقہ کو9وکٹوں سے شکست دی۔ نیوزی لینڈ نے ٹاس جیت کر فیلڈنگ کا فیصلہ کیا۔ جنوبی افریقہ نے 20 اوورز میں 8وکٹوں کے نقصان پر 169رنز بنائے۔ڈیوالڈ بریوس نے 34 اور ٹرسٹن سٹبز نے 29 رنز بنائے۔ مارکو جینسن نے 30گیندوں پر 55 رنز کی ناٹ آؤٹ اننگز کھیلی جس میں 5 چھکے اور 2 چوکے شامل تھے۔ نیوزی لینڈ کی جانب سے میٹ ہینری، کول میک کونچی اور رچن روندرا نے2،2وکٹیں حاصل کیں۔

جواب میں اوپنرز کی دھواں دہار بیٹنگ کی بدولت نیوزی لینڈ نے 170رنز کا ہدف12.5اوورزمیں ایک وکٹ کے نقصان پر حاصل کرلیا۔ٹم سیفرٹ اور ’’فن ایلن‘‘ نے ٹیم کو 117رنز کا آغاز فراہم کیا۔ٹم سیفرٹ نے 2چھکوں اور 7چوکوں کی مدد سے 58رنز بنائے۔فن ایلن نے طوفانی اننگز کھیلتے ہوئے 33گیندوں پر سنچری سکور کی۔یہ ٹی ٹوئنٹی ورلڈ کپ کی تاریخ کی تیز ترین سنچری ہے۔فن ایلن نے 8چھکے اور10چوکے لگائے۔

نیوزی لینڈ دوسری مرتبہ ٹی ٹوئنٹی ورلڈ کپ کے فائنل میں پہنچا ہے۔اس سے قبل اس نے 2021کے فائنل میں جگہ بنائی تھی اور رنر اپ رہا۔ دوسرا سیمی فائنل کل بھارت اور انگلینڈ کے درمیان ممبئی میں کھیلا جائے گا۔