مصطفیٰ کمال کی تمام والدین سے پانچ سال سے کم عمر بچوں کو پولیو کے قطرےپلوانے کی اپیل

اسلام آباد:وفاقی وزیر صحت سید مصطفیٰ کمال نے تمام والدین سے اپنے پانچ سال سے کم عمر بچوں کو پولیو کے قطرےپلوانے کی اپیل کردی ۔
وفاقی وزیر صحت سید مصطفیٰ کمال نے اپنے ویڈیو پیغام میں تمام والدین کو مخاطب کرتے ہوئے کہا کہ یاد رکھیں! پولیو وائرس ہمارے درمیان موجود ہے اور آپ کے بچوں کو عمر بھر کی معذوری میں مبتلا کر سکتا ہے۔ اپنے پانچ سال سے کم عمر بچوں کو ہر بار پولیو کے قطرے ضرور پلوائیں تاکہ وہ اس خطرناک وائرس سے محفوظ رہیں۔
وفاقی وزیر نے مزید کہا کہ دنیا کے تمام ممالک، بشمول مسلم ممالک، اسی ویکسین کے ذریعے پولیو سے پاک ہو چکے ہیں جو آج پاکستان میں استعمال ہو رہی ہے۔ لہٰذا منفی سوچوں اور رجحانات کو یکسر رد کریں، اور اپنے بچوں کے صحت مند مستقبل کے لیے پولیو ویکسینیشن کو یقینی بنائیں۔