اوگرا کی جانب سے آر ایل این جی کی قیمتوں کا تعین کر کے نرخوں میں کمی

اسلام آباد:آئل اینڈ گیس ریگولیٹری اتھارٹی (اوگرا) نے وفاقی حکومت کی پالیسی گائیڈ لائنز کے مطابق سوئی کمپنیوں کی جون 2025ء کے لئے ری گیسیفائیڈ لیکوئڈ نیچرل گیس (آر ایل این جی) کی قیمتوں کا تعین کر کے کمی کر دی ہے جس کا اطلاق یکم جون 2025ء سے ہوگا۔
ترجمان اوگرا عمران غزنوی کے جاری بیان کے مطابق سوئی ناردرن گیس پائپ لائن لمیٹڈ (ایس این جی پی ایل) کے صارفین کے لیے قیمتوں میں گزشتہ ماہ (مئی 2025ء) کے مقابلے میں آر ایل این جی کی قیمت میں 0.09فیصد یا 0.0109 ڈالر فی ایم ایم بی ٹی یو کمی ہوئی ہے جبکہ سوئی سدرن گیس کمپنی لمیٹڈ (ایس ایس جی سی ایل) صارفین کے لیے قیمتوں میں گزشتہ ماہ (مئی 2025ء) کے مقابلے میں 0.0092 ڈالر فی ایم ایم بی ٹی یو یا0.08فیصد کمی ہوئی ہے۔
انہوں نے کہا کہ آر ایل این جی کی قیمتوں میں کمی بین الاقوامی مارکیٹ میں درآمدی قیمتوں (ڈیلیوری ایکس شپ ) میں کمی کی وجہ سے ہے۔ اوگرا نے جاری نوٹیفکیشن میں ایس این جی پی ایل صارفین کے لیے آر ایل این جی کی اوسط فروخت کی قیمت 11.7816 ڈالرفی ایم ایم بی ٹی یو اور ایس ایس جی سی ایل صارفین کے لئے 10.8650 ڈالر فی ایم ایم بی ٹی یو مقرر کی ہے۔