اسلام آباد :پاکستان تحریک انصاف کے چیئرمین بیرسٹر گوہر خان نے کہا ہے کہ سپریم کورٹ نے آرڈر کیا تھا آئندہ کسی کو بھی گھر سے اٹھایا نہیں جائے گا ہمارے ایم این اے خواجہ شیراز کو کل رات نقاب پوش اغوائکر کے لے گئے۔
اسلام آباد میں میڈیا سے گفتگو کرتے ہوئے بیرسٹر گوہر خان نے کہا کہ خواجہ شیراز قومی اسمبلی کی قائمہ کمیٹی کے چیئرمین ہیں، گزشتہ شب نقاب پوش افراد خواجہ شیراز کے گھر میں داخل ہوئے اور انہیں اغواء کر لیا۔
انہوں نے بتایا کہ خواجہ شیراز کی فیملی کہہ رہی ہے کہ انہیں اسلام آباد لایا گیا ہے، حاجی امتیاز کے گھر بھی ایسے ہی دھاوا بولا گیا تھا۔
بیرسٹر گوہر خان کا کہنا ہے کہ سپریم کورٹ نے آرڈر کیا تھا آئندہ کسی کو بھی گھر سے اٹھایا نہیں جائے گا، یہ بات میں نے وزیرِ اعظم کے بھی گوش گزار کی تھی۔
چیئرمین پی ٹی آئی نے کہا کہ ہمارے ایم این ایز کو اسمبلی کے اندر سے اٹھایا گیا، اس کے بعد کمیٹی بنی جس کا مقصد پارلیمنٹرینز کا تحفظ تھا، ہم نے خصوصی کمیٹی میں یہ کہا تھا کہ آپ پارلیمنٹرینز کو تحفظ فراہم کریں۔
ان کا یہ بھی کہنا ہے کہ آج تک وہ ظلم اور لاقانونیت ختم نہیں ہوئی، ان حالات میں بھی لوگ باہر نہ نکلیں، احتجاج نہ کریں تو پھر کیا کریں؟
