لاہور: پاکستان اور آسٹریلیا کے درمیان تیسرے اور آخری ٹی ٹوئنٹی میچ کے موقع پر آسٹریلیا کے ہائی کمشنر ٹموتھی کین، وفاقی وزیر اطلاعات عطا اللہ تارڑ اور گورنر گلگت بلتستان سید مہدی شاہ قذافی اسٹیڈیم پہنچے۔
چیئرمین پاکستان کرکٹ بورڈ محسن نقوی نے معزز مہمانوں کا اسٹیڈیم آمد پر خیرمقدم کیا۔ اس موقع پر چیئرمین پی سی بی، آسٹریلوی ہائی کمشنر، وفاقی وزیر اطلاعات اور گورنر گلگت بلتستان نے پاکستان اور آسٹریلیا کے درمیان میچ دیکھا اور کھلاڑیوں کے عمدہ کھیل کو سراہا۔
آسٹریلیا کے ہائی کمشنر ٹموتھی کین نے قذافی اسٹیڈیم میں بہترین انتظامات کی تعریف کرتے ہوئے کہا کہ شائقین کرکٹ کا نظم و ضبط اور جذبہ مثالی ہے۔ انہوں نے کہا کہ اسٹیڈیم میں شائقین کے چہروں پر مسکراہٹیں دیکھ کر بے حد خوشی ہوئی۔
چیئرمین پی سی بی محسن نقوی نے اس موقع پر کہا کہ پاکستان کے لوگ کھیلوں، خصوصاً کرکٹ سے والہانہ لگاؤ رکھتے ہیں۔ انہوں نے مزید کہا کہ پاکستان ایک پرامن ملک ہے اور یہاں کے لوگ امن پسند ہونے کے ساتھ کرکٹ سے بے پناہ محبت کرتے ہیں۔
