اسلام آباد: پاکستان نے امریکا کے صدر ڈونلڈ جے ٹرمپ کی جانب سے وزیراعظم محمد شہباز شریف کو دی گئی دعوت کے جواب میں بورڈ آف پیس (BOP) میں شمولیت کا فیصلہ کیا ہے۔ یہ اقدام اقوام متحدہ کی سلامتی کونسل کی قرارداد 2803 کے تحت غزہ امن منصوبے کے نفاذ میں پاکستان کی جاری کوششوں کا حصہ ہے۔
ترجمان دفترخارجہ کے مطابق پاکستان نے امید ظاہر کی ہے کہ اس فریم ورک کے قیام سے مستقل جنگ بندی کے نفاذ، فلسطینیوں کے لیے انسانی ہمدردی کی امداد میں اضافہ اور غزہ کی تعمیر نو کے لیے عملی اقدامات کیے جائیں گے۔
ترجمان دفترخارجہ کاکہناہے کہ پاکستان نے امیدظاہر کی ہےکہ یہ کوششیں فلسطینی عوام کے حق خود ارادیت کے حصول کی طرف بھی منتج ہوں گی، جو ایک معتبر، وقت سے مشروط سیاسی عمل کے ذریعے بین الاقوامی قانونی حیثیت اور متعلقہ اقوام متحدہ کی قراردادوں کے مطابق ہوگی، جس کے نتیجے میں ایک آزاد، خودمختار اور مربوط فلسطینی ریاست قائم ہوگی، جو 1967 کی سرحدوں پر مبنی ہوگی اور اس کا دارالحکومت القدس الشریف ہوگا۔
ترجمان دفترخارجہ کاکہناہے کہ پاکستان بورڈ آف پیس کا حصہ بن کر ان اہداف کے حصول اور فلسطینی بھائیوں اور بہنوں کے دکھوں کو ختم کرنے میں مثبت کردار ادا کرنے کا عزم رکھتا ہے۔
