اسلام آباد: صدرِ مملکت آصف علی زرداری نے کہا ہے کہ پاکستان پیپلز پارٹی کی جدوجہد نے ملک میں جمہوریت کو مضبوط کیا اور 1973ء کا متفقہ آئین ذوالفقار علی بھٹو شہید کا تاریخی تحفہ ہے۔ انہوں نے کہا کہ آمریت کے خلاف مزاحمت اور عوامی حقوق کی بحالی پیپلز پارٹی کا تاریخی کارنامہ ہے۔
پیپلزپارٹی کے یوم تاسیس پر اپنے پیغام میں صدر مملکت نے کہا ہے کہ وفاق کے استحکام اور قومی یکجہتی میں پیپلز پارٹی کا کلیدی کردار ہے اور گلگت بلتستان و آزاد کشمیر میں اصلاحات پارٹی کا اہم کارنامہ ہیں۔ انہوں نے کہا کہ ملک کے ایٹمی پروگرام کی بنیاد پیپلز پارٹی نے رکھی اور زمین، مزدور، تعلیم اور سماجی انصاف کی تاریخی اصلاحات پارٹی کی شناخت ہیں۔ ایم آر ڈی سے اے آر ڈی تک پیپلز پارٹی جمہوری ارتقا ءکی معمار رہی ہے اور چارٹر آف ڈیموکریسی اور اٹھارویں ترمیم پارٹی کا جمہوری ورثہ ہیں۔
انہوں نے کہا کہ نیشنل ایکشن پلان میں پیپلز پارٹی کی شمولیت اہم ہے اور پارٹی ہمیشہ مزدور، کسان، خواتین اور اقلیتوں کی آواز رہی ہے۔صدر مملکت نے کہا کہ محروم طبقات کی شمولیت پارٹی کے مشن کا مرکز ہے اور جمہوریت، مساوات اور سماجی انصاف کے عزم کی تجدید کی ضرورت ہے۔ انہوں نے کہا کہ خواتین و اقلیتوں کی بااختیاری پاکستان کے روشن مستقبل کی ضمانت ہے اور کارکنان جمہوری اتحاد کو برقرار رکھیں۔صدر آصف علی زرداری نے کہا کہ پیپلز پارٹی ایک روادار، روشن خیال پاکستان کے لیے پرعزم ہے۔انہوں نے بانی چیئرمین ذوالفقار علی بھٹو اور سابق وزیراعظم بینظیر بھٹو کو خراجِ عقیدت پیش کیا۔
