اسلام آباد:پاکستان نے ایران کی جوہری تنصیبات پر امریکہ کے حملوں کی سخت الفاظ میں مذمت کرتے ہوئے ان حملوں کو بین الاقوامی قوانین کی سنگین خلاف ورزی قرار دیا ہے۔ دفتر خارجہ کے ترجمان نے ایک بیان میں کہا ہے کہ اس نوعیت کی کارروائیاں خطے میں کشیدگی کو مزید بڑھا سکتی ہیں اور عالمی امن کے لیے خطرناک ثابت ہو سکتی ہیں۔
ترجمان دفتر خارجہ کے مطابق ایران کے خلاف یہ “ناقابلِ مثال جارحیت اور خلاف ورزیاں” نہایت افسوسناک اور تشویشناک ہیں۔ ترجمان نے واضح کیا کہ ایران کو اقوام متحدہ کے چارٹر کے تحت اپنے دفاع کا پورا حق حاصل ہے۔
بیان میں کہا گیا ہے کہ امریکی حملوں کے فوراً بعد اسرائیل کی جانب سے بھی ایران پر متعدد حملے کیے گئے، جس کے باعث خطے میں مزید جارحیت کے حوالے سے تشویش ہے۔
ترجمان کا کہنا ہے کہ پاکستان تمام فریقین سے مطالبہ کرتا ہے کہ وہ انسانی حقوق اور بین الاقوامی قوانین کا احترام کریں، اور فوری طور پر جارحیت بند کر کے مذاکرات کا راستہ اپنائیں۔
دفتر خارجہ نے زور دیا کہ تنازعے کا واحد حل اقوام متحدہ کے چارٹر کے مطابق سفارت کاری اور پرامن مذاکرات ہیں۔ پاکستان علاقائی امن کے لیے ہر ممکن سفارتی کوششوں کی حمایت جاری رکھے گا۔
