پاکستان کے جوہری ہتھیاروں کو بین الاقوامی ایٹمی توانائی ایجنسی کی نگرانی میں لیا جانا چاہئے،بھارتی وزیردفاع کی ہرزہ سرائی

نئی دہلی: بھارت کے وزیر دفاع راج ناتھ سنگھ نے کہا ہے کہ پاکستان کے جوہری ہتھیاروں کو بین الاقوامی ایٹمی توانائی ایجنسی کی نگرانی میں لیا جانا چاہئے۔
مقبوضہ کشمیر میں بادامی باغ کنٹونمنٹ میں بھارتی فوج سے خطاب میں راج ناتھ سنگھ کا کہنا تھا کہ وہ دنیا سے پوچھنا چاہتے ہیں کہ کیا پاکستان جیسی غیرذمہ دار قوم کے ہاتھوں میں موجود ایٹمی ہتھیار محفوظ ہیں؟ پوری دنیا نے دیکھا ہے کہ کیسے پاکستان کی جانب سے انڈیا کو ایٹمی ہتھیاروں سے متعلق دھمکیاں دی گئیں۔
ان کا مزید کہنا تھا کہ ان کے دورہ کشمیر کا مقصد کشمیری عوام اور یہاں تعینات فوجیوں کا شکریہ ادا کرنا ہے، جس طرح کا ردعمل انہوں نے پہلگام حملے کے بعد دیا وہ قابل تحسین ہے۔
اس دورے کے آغاز پر انہیں انڈین فوج کی جانب سے شیل، گولوں اور میزائل کے ٹکڑے بھی دکھائے گئے جو انڈیا کے مطابق مبینہ طور پر پاکستان کی جانب سے فائر کیے گئے تھے۔
انہوں نے تقریب سے خطاب کرتے ہوئے دہشت گردی اور دہشت گردوں کے پاکستان میں موجود ٹھکانوں سے متعلق انہی الزامات کو دہرایا جو انڈیا کئی دنوں سے عائد کرتا چلا آیا ہے اور جنہیں پاکستان بارہا مسترد کر چکا ہے۔