اسلام آباد: پاکستان تحریک انصاف کے رہنما ء شاہ محمود قریشی کے جسمانی ریمانڈ میں توسیع کرتے ہوئے عدالت نے مزید 3 دن کے لیے انہیں ایف آئی اے کے حوالے کردیا۔
آفیشل سیکرٹ ایکٹ عدالت اسلام آباد میں پاکستان تحریک انصاف کے رہنما شاہ محمود قریشی کے خلاف سائفر کیس کی سماعت ہوئی، جس میں انہیں 4 روزہ جسمانی ریمانڈ مکمل ہونے کے بعد پیش کردیا گیا۔ اس موقع پر شاہ محمود قریشی کے وکیل شعیب شاہین اور اسپیشل پراسیکیوٹر شاہ خاور بھی عدالت میں موجود تھے۔
آفیشل سیکرٹ ایکٹ خصوصی عدالت کے جج ابوالحسنات نے سائفر کیس میں ایف آئی اے کی جانب سے شاہ محمود قریشی کے مزید جسمانی ریمانڈ کی استدعا پر فریقین کے دلائل سننے کے بعد فیصلہ محفوظ کرلیا۔
بعد ازاں عدالت نے شاہ محمود قریشی کے جسمانی ریمانڈ میں 3 دن کی توسیع کردی اور انہیں مزید 3 روزہ جسمانی ریمانڈ پر ایف آئی اے کے حوالے کردیا۔
