لندن :پاکستان ہائی کمیشن لندن نے خوشخبری سناتے ہوئے اعلان کیا ہے کہ پاکستان انٹرنیشنل ایئرلائن (PIA) کی برطانیہ کے لیے پروازیں رواں ماہ سے دوبارہ شروع کی جا رہی ہیں۔
برطانیہ میں تعینات پاکستان کے ہائی کمشنر ڈاکٹر محمد فیصل نے برطانیہ کی سول ایوی ایشن اتھارٹی (UK CAA) کا شکریہ ادا کیا جنہوں نے آج ‘فارِن ایئرکرافٹ آپریٹنگ پرمٹ’ (FOP) جاری کیا، جو پاکستان اور برطانیہ کے درمیان کمرشل پروازوں کی بحالی کے لیے آخری ضروری اجازت نامہ تھا۔
اس سے قبل پی آئی اے کو برطانیہ میں پروازوں کے لیے تھرڈ کنٹری آپریٹر (TCO) کی منظوری بھی حاصل ہو چکی ہے۔
پی آئی اے اپنی پروازیں پہلے مرحلے میں مانچسٹر کے لیے بحال کرے گی، جس کے بعد برمنگھم اور لندن کے لیے بھی پروازیں شروع کی جائیں گی۔
اس فیصلے سے برطانیہ میں مقیم 17 لاکھ سے زائد پاکستانیوں کو پاکستان آنے جانے میں سہولت حاصل ہوگی اور دونوں ملکوں کے درمیان سفری روابط مزید مضبوط ہوں گے۔
