اسلام آباد:پاکستان اور انڈونیشیا نے دوطرفہ شراکت داری کو جامع ترقی کے اصولوں پر استوار کرنے کا فیصلہ کیا ہے ۔ایوان صدر اسلام آباد میں صدر آصف علی زرداری اور انڈونیشیا کے صدرپرابووو سوبیانتو کے درمیان ہونے والی ملاقات میں دونوں رہنماؤں نے آئی ٹی ،زراعت،توانائی اور سیاحت کے شعبوں میں تعاون بڑھانے پر اتفاق کیا۔
انڈونیشیا کے صدر پرابووو سوبیانتوایوان صدر پہنچے تو صدر آصف علی زرداری نے مرکزی دروازے پر معزز مہمان کا استقبال کیا۔ نائب وزیراعظم اور وزیر خارجہ محمد اسحاق ڈار بھی اس موقع پر موجود تھے ۔
صدر آصف علی زرداری اور انڈونیشیا کے صدر پرابووو سوبیانتو کے درمیان ہونے والی ملاقات میں دو طرفہ تعلقات کے مختلف پہلووں کا جائزہ لیا گیا ۔ دونوں رہنماوں نے مشترکہ اقدار اور دیرینہ خیر سگالی پر مکمل اتفاق کیا۔ انہوں نے دفاع سمیت امن واستحکام اور خوشحالی کے لیے تعاون بڑھانے پر اتفاق کیا ۔
دونوں صدور نے بین المذاہب ہم آہنگی اوربرداشت کے فروغ کے عزم کا اعادہ کیا۔صدر آصف علی زرداری اور انڈونیشیا کے صدر پرابووو سوبیانتو دو طرفہ تجارت میں اضافے پر اطمینان کا اظہار کرتے ہوئے تجارت میں توازن اور تنوع پر زور دیا۔ انہوں نے مشترکہ تجارتی کمیٹی کو کاروباری روابط بڑھانے کا موثر فورم قرار دیا ۔
دونوں رہنماوں نے موسمیاتی تبدیلی ، آفات سے نمٹنے اور پائیدار ترقی کیلئے مشترکہ کوششوں پر زور دیا۔ صدر مملکت اور انڈونیشیا کے صدر نے اسلامو فوبیا کے خلاف مشترکہ کوششوں پر پاکستان اور انڈونیشیا کے عزم کا اظہار کیا۔ صدر مملکت نے انڈونیشیا کے صدر کو مقبوضہ جموں و کشمیر کی صورتحال سے آگاہ کیا ۔ انہوں نے خطے میں امن اور ترقی کی ضرورت پر زور دیا ۔
