اسلام آباد :صدرِ مملکت آصف علی زرداری اور وزیرِ اعظم محمد شہباز شریف نے کوئٹہ میں فتنۂ الخوارج کے خودکش حملے کی سخت الفاظ میں مذمت کرتے ہوئے سیکیورٹی فورسز کو مؤثر کارروائی پر خراجِ تحسین پیش کیا ہے۔
صدرِ مملکت نے کہا کہ فتنۂ الخوارج اور بھارت کے ایجنڈے پر کام کرنے والے عناصر پاکستان کے امن و استحکام کو نقصان نہیں پہنچا سکتے۔ انہوں نے سیکیورٹی فورسز کی بروقت اور مؤثر کارروائی پر خراجِ تحسین پیش کیا اور زخمی ایف سی جوانوں کی جلد صحت یابی کے لیے دعا کی۔
صدر آصف علی زرداری نے موقف اختیار کیا کہ پاکستان دشمن قوتوں کی مایوسی ان کی ناکامی اور انجامِ بد کی علامت ہے ۔عالمی اور علاقائی منظرنامہ پاکستان مخالف ریاستوں اور ان کی پراکسیز کے خلاف تبدیل ہو رہا ہے، اس لیے وہ مایوسی اور بوکھلاہٹ کا شکار ہیں۔ انہوں نے عزم ظاہر کیا کہ پاکستان اس کے عوام اور سیکیورٹی فورسز بالآخر غالب آئیں گے۔
وزیراعظم محمد شہباز شریف نے بھی حملے کی مذمت کرتے ہوئے کہا کہ سیکیورٹی فورسز نے فتنہ الہندوستان کے دہشتگردوں کو ناکام بنایا اور ان کے ناپاک عزائم کو خاک میں ملایا جائے گا۔ وزیراعظم نے زخمی اہلکاروں اور شہریوں کی جلد صحت یابی کے لیے دعا کی اور اس عزم کا اظہار کیا کہ حکومت، سیکیورٹی فورسز اور پوری قوم ملک سے دہشتگردی اور فتنہ الہندوستان کے جڑ سے خاتمے کے لیے پرعزم ہیں۔ انہوں نے کہا کہ ملک کی سالمیت کو نقصان پہنچانے والے عناصر کو عبرت ناک سزا دی جائے گی۔
انہوں نے فتنہ الہندوستان کے دہشتگردوں کو جہنم واصل کرنے پر سیکیورٹی فورسز کی پزیرائی کی ہے۔
