تہران:وزیرِ اعظم محمد شہباز شریف نے ایران کا دو روزہ سرکاری دورہ مکمل کر لیا ہے۔ مہرآباد ائیرپورٹ تہران پر ایرانی وزیر داخلہ اسکندر مومنی، پاکستان میں ایران کے سفیر رضا امیری مقدم، ایران میں پاکستان کے سفیر مدثر ٹیپو اور دیگر اعلیٰ سفارتی اہلکاروں نے وزیرِ اعظم اور ان کے وفد کو رخصت کیا۔
دورے کے دوران وزیرِ اعظم نے ایران کے سپریم لیڈر آیت اللہ سید علی خامنہ ای اور ایرانی صدر ڈاکٹر مسعود پزشکیان سے ملاقاتیں کیں۔ ملاقاتوں میں پاکستان ایران تعلقات بالخصوص تجارت اور علاقائی روابط کے فروغ پر گفتگو ہوئی۔ملاقاتوں میں علاقائی امور پر گفتگو اور بھارت کی پاکستان پر مسلط کردہ جنگ کے دوران ایران کی خطے میں امن کی کوششوں کو سراہا گیا۔ دونوں ممالک کے مابین اسٹریٹجک تعلقات کی مضبوطی کے علاوہ غزہ میں جاری صہیونی ظلم و جبر کی فوری روک تھام اور پائیدار و دیرپا جنگ بندی کا معاملات بھی زیر بحث آئے۔
وزیرِ اعظم اپنا دو طرفہ دورہء ایران مکمل کرکے آذری صدر کی دعوت پر آذربائیجان کا دورہ کررہے ہیں۔ ترکیہ اور ایران کے بعد وزیرِ اعظم اپنے چار ملکوں کے دورے کے تیسرے مرحلے کیلئے آذربائیجان جا رہے ہیں جبکہ اسکے بعد وزیرِاعظم تاجکستان جائیں گے۔
