وزیراعظم شہبازشریف کی سعودی ولی عہد سے ملاقات،دونوں رہنماؤں کااسٹریٹجک شراکت داری کو مزید مضبوط بنانے اور اسے نئی بلندیوں تک لے جانے پر اتفاق

جدہ:وزیراعظم شہبازشریف نے مکہ مکرمہ میں عمرہ کی ادائیگی کے بعد ولی عہد اور سعودی وزیراعظم شہزادہ محمد بن سلمان بن عبدالعزیز سے تفصیلی ملاقات کی جس میں دونوں رہنماؤں نے اسٹریٹجک شراکت داری کو مزید مضبوط بنانے اور اسے نئی بلندیوں تک لے جانے پر اتفاق کیا۔
وزیراعظم آفس سے جاری اعلامیہ کے مطابق وزیراعظم شہبازشریف اور ولی عہد محمد بن سلمان کی وفود کے ہمراہ تفصیلی ملاقات میں پاکستان اور مملکت سعودی عرب کے درمیان گہرے، سٹریٹجک اور برادرانہ تعلقات کا اعادہ کیاگیا،وزیراعظم نے پاک بھارت کشیدگی کے دوران مملکت کے فعال کردار اور امن و استحکام کو فروغ دینے کو سراہااورکہاکہ جنوبی ایشیا میں پائیدار امن صرف بات چیت کے ذریعے ہی ممکن ہے۔
دونوں رہنماوٴں نے غزہ کی سنگین انسانی صورتحال پر بات چیت کی اور بین الاقوامی برادری پراخلاقی اور قانونی ذمہ داریوں کو پورا کرنے پر زور دیا،مسئلہ فلسطین کے منصفانہ اور پائیدار حل کے لیے اپنی غیر متزلزل حمایت کا اعادہ کیا،وزیر اعظم شہباز شریف نے سیاسی، اقتصادی اور سیکورٹی کے شعبوں میں دوطرفہ تعاون کی بڑھتی ہوئی رفتار پر اطمینان کا اظہار کیا۔
دونوں رہنماؤں نے اسٹریٹجک شراکت داری کو مزید مضبوط بنانے اور اسے نئی بلندیوں تک لے جانے پر اتفاق کیا۔
وزیرِ اعظم نے سعودی ولی عہد محمد بن سلمان کو پاکستان کے سرکاری دورے کی دعوت دی جو انہوں نے قبول کر لی۔