پیپلز پارٹی کے زیرِ اہتمام پشاور میں "صوبہ بچاؤ تحریک” کے سلسلے میں احتجاجی مظاہرہ ،پولیس کی مظاہرین پرشدید شیلنگ، لاٹھی چارج

پشاور :خیبرپختونخوا کے صوبائی دارالحکومت پشاور میں پاکستان پیپلز پارٹی کے زیرِ اہتمام "صوبہ بچاؤ تحریک” کے سلسلے میں احتجاجی مظاہرہ کیا گیا۔
اسمبلی چوک پر منعقدہ ریلی میں صوبائی قائدین، خواتین ونگ اور کارکنان کی بڑی تعداد نے شرکت کی۔احتجاج کا مقصد صوبے میں بڑھتی ہوئی مہنگائی، بدامنی، کرپشن اور سرکاری ملازمین کی برطرفیوں کے خلاف آواز بلند کرنا تھا۔
اسمبلی چوک کی طرف پیش قدمی پر پولیس نے مظاہرین کو روکنے کے لیے شدید شیلنگ اور لاٹھی چارج کیا، جس کے نتیجے میں کئی کارکن زخمی ہو گئے۔
اس موقع پر پیپلز پارٹی کے رہنماؤں نے اظہار خیال کرتے ہوئے خیبر پختونخوا حکومت کو ناکام قرار دیا۔ انہوں نے مطالبہ کیا کہ حکومت عوام کو جواب دے اور ان کے تیار کردہ چارٹر آف ڈیمانڈ کو تسلیم کرے، بصورت دیگر احتجاج کا دائرہ مزید وسیع کیا جائے گا۔
احتجاج کی وجہ سے پشاور بھر میں ٹریفک کا نظام متاثر رہا، جبکہ پولیس نے مظاہرین کو اسمبلی چوک جانے سے روکنے کے لئے اہم راستے بند کر رکھےتھے۔